Salome Zurabişvili
Noyabrın 28-də Gürcüstan prezidenti seçilən Salome Zurabişvili həm bu ölkədə, həm də Cənubi Qafqazda ilk qadın dövlət başçısıdır.
1952-ci ildə Fransa paytaxtında, gürcü mühacirlərin ailəsində anadan olan Salome Zurabişvili Paris Siyasi Elmlər İnstitutunu və ABŞ-ın Kolumbiya Universitetini bitirib. 1974-cü ildən Fransa Xarici İşlər Nazirliyi sistemində çalışıb.
2003-cü ildə Gürcüstana səfir göndərilən Salome Zurabişvili 2004-cü ildən bu ölkənin xarici işlər naziri olub. 2005-ci ildə nazir postundan gedən Salome Zurabişvili bir müddət ictimai hərəkat, sonra partiya lideri olub, 2016-cı ildə parlamentin deputatı seçilib.
2018-ci ilin prezident seçkisinə (ilk turu oktyabrın 28-də, ikinci turu noyabrın 28-də keçirilib) müstəqil namizəd kimi qoşulan Salome Zurabişvili hakim Gürcü Arzusu – Demokratik Gürcüstan Partiyasının dəstəyini alıb.
Salome Zurabişvilinin ayrıldığı ilk həyat yoldaşından Teymuraz adlı oğlu, Ketevan adlı qızı var, ikinci həyat yoldaşı isə vəfat edib.
