Poroşenko və rəqibləri
2019-cu il martın 31-i Ukraynada prezident seçkisi keçiriləcək. Novator.az-ın məlumatına görə, “Sosiopolis” Sosial Texnologiyalar İnstitutunun keçirdiyi son sorğuya əsasən, indiki prezident Pyotr Poroşenko seçicilərin 7,8%-nin dəstəyini qazanıb. Vətəndaş Mövqeyi Partiyasının lideri Anatoli Qritsenko da bir o qədər səsə layiq bilinib.
8-16 noyabr arası 2403 seçici arasında aparılmış sorğuda 18,5 %-lə Ali Radanın deputatı, Batkivşina Partiyasının lideri Yuliya Timoşenko üstün gəlib.
Şoumen Vladimir Zelenski 10,8%-lə ikinci yerdə qərarlaşıb.
Müxalif deputat Yuri Boykonu respondentlərin 7,4%-i, müğənni Svyatoslav Vakarçuku 5,5%-i, deputat, Radikal Partiyanın lideri Oleq Lyaşkonu 4,8%-i prezident seçməyə hazırdır.
Pyotr Poroşenko 2014-cü il mayın 25-də Ukrayna prezidenti seçilib, iyunun 7-də səlahiyyətlərinin icrasına başlayıb.
1965-ci il sentyabrın 26-da Ukraynanın Odessa vilayətində doğulan Pyotr Poroşenko 1989-cu ildə Kiyev Dövlət Universitetinin beynəlxalq münasibətlər və beynəlxalq hüquq fakültəsini, 1992-ci ildə həmin təhsil ocağının aspiranturasını bitirib. Hüquq elmləri namizədidir.
1993-cü ildən “Ukrprominvest” konserninin baş direktoru, 2002-ci ildən Ukrayna Milli Bankı Şurasının sədr müavini, 2007-ci ildən sədri olub.
2005-ci ildə Milli Təhlükəsizlik və Müdafiə Şurasının katibi, 2009-2010-cu illərdə xarici işlər naziri, 2012-ci ildə iqtisadi inkişaf və ticarət nazir postlarını tutub.
1998, 2002, 2006 və 2012-ci illərin parlament seçkilərində deputat mandatı alıb.
