Liqada aydınlıqlar
UEFA Çempionlar Liqasının qrup mərhələsində beşinci tur start götürüb. Noyabrın 27-də keçirilən oyunlardan sonra E qrupundan “Bavariya” (Almaniya) və “Ayaks” (Hollandiya) 1/8 finala vəsiqəni təmin ediblər, “Benfika”nın (Portuqaliya) isə Avropa Liqasına köç eləməsi dəqiqləşib.
F qrupundan “Mançester Siti” (İngiltərə) mərhələ adlayıb. İkinci vəsiqə ya “Lion”a (Fransa), ya da “Şaxtyor”a (Ukrayna) qismət olacaq.
“Real” (İspaniya) və “Roma” (İtaliya) komandalarının G qrupunu ilk iki sırada bitirəcəyi bilinib. Avropa Liqasına keçmək uğrunda SSKA (Rusiya) ilə “Viktoriya” (Çexiya) mübarizə aparırlar.
H qrupundan “Yuventus” (İtaliya) və “Mançester Yunayted” (İngiltərə) növbəti raunda keçiblər, “Valensiya” (İspaniya) isə mübarizəni Avropa Liqasında davam etdirəcək.
Novator.az-ın məlumatına görə, dörd turdan sonra A qrupunda “Borussiya” (Dortmund, Almaniya) və “Atletiko” (İspaniya) 9 xalla öndədirlər. “Brügge”nin (Belçika) 4 xalı var.
1 xal yığan “Monako” (Fransa) mərhələ adlamaq şansını itirib.
1/8 finala çıxmaq üçün qrupda ən azı ikinci yeri tutmaq gərəkdir. Üçüncü yerin sahibi Avropa Liqasına köç edəcək.
B qrupunda “Barselona” (İspaniya) 10 xalla liderlik edir. “İnter” (İtaliya) 7 xal, “Tottenhem” (İngiltərə) 4 xal, PSV (Hollandiya) 1 xal toplayıb.
C qrupunda “Liverpul” (İngiltərə) və “Napoli” (İtaliya) 6 xala, PSJ (Fransa) 5 xala, “Srvena Zvezda” (Serbiya) 4 xala sahibdir.
D qrupunda “Portu” (Portuqaliya) 10 xal, “Şalke” (Almaniya) 8 xal, “Qalatasaray” (Türkiyə) 4 xal yığıb.
Xalsız olan “Lokomotiv”in (Moskva, Rusiya) 1/8 finala çıxmaq şansı qalmayıb.
