11 min manat ödənişi üzrə yeni qərarlar
Prezident İlham Əliyevin 19 aprel 2018-ci il fərmanının icrası üçün Əmək və Əhalinin Sosial Müdafiəsi Nazirliyində yaradılmış komissiyanın növbəti iclası keçirilib. Noyabrın 28-də yayılan rəsmi məlumata görə, iclasda daha 161 şəhid hərbi qulluqçu üzrə 240 vərəsəyə birdəfəlik ödəmənin verilməsi qərarı qəbul edilib.
Novator.az bildirir ki, prezident İlham Əliyevin bu il aprelin 19-da imzaladığı fərmana əsasən, 1997-ci il avqustun 2-dək Azərbaycanın ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə 11 min manat məbləğində birdəfəlik ödəmə verilir. Ödəməni Əmək və Əhalinin Sosial Müdafiəsi Nazirliyi həyata keçirir.
Oktyabrın 9-dan şəhid hərbi qulluqçuların vərəsələrinin birdəfəlik ödəmə ilə təmin olunması üçün sənəd qəbulu başlayıb.
Noyabrın 28-dək 608 şəhid hərbi qulluqçu üzrə 825 vərəsəyə birdəfəlik ödəmənin verilməsi üçün qərarlar çıxarılıb. Rəsmi bilgiyə əsasən, qanuni qüvvəyə minmiş məhkəmə aktları əsasında 473 şəhid hərbi qulluqçu üzrə 474 vərəsə də ödənişlə təmin olunub.
1997-ci il avqustun 2-də “Hərbi qulluqçuların dövlət icbari şəxsi sığortası haqqında” qanun qüvvəyə minib və həmin dövrdən sonra hərbi qulluqçuların həlak olması, itkin düşməsi və ya xəsarət alması zamanı sığorta ödənişlərinin verilməsi həyata keçirilib.
