Prezident Administrasiyasının yeni şöbə müdiri
Hikmət Hacıyev Prezident Administrasiyasının xarici siyasət məsələləri şöbəsinin müdiri təyin edilib. Dövlət başçısı İlham Əliyev sərəncamı noyabrın 26-da imzalayıb. Novator.az bildirir ki, administrasiyanın strukturuna görə, Hikmət Hacıyev prezidentin xarici siyasət məsələləri üzrə köməkçisi də sayılır.
Xarici siyasət məsələləri şöbəsinin müdiri postu bu il aprelin 21-dən – həmin vəzifəni tutmuş Novruz Məmmədov baş nazir təyin olunandan boş idi. Sentyabrın 18-də Hikmət Hacıyev xarici siyasət məsələləri şöbəsinin müdir müavini təyin olunub, o vaxtdan şöbəyə rəhbərliyi həyata keçirib.
Hikmət Hacıyev 1979-cu ildə Gəncə şəhərində anadan olub. Bakı Dövlət Universitetinin beynəlxalq münasibətlər və beynəlxalq hüquq fakültəsinin bakalavr və magistr pillələrini bitirib, daha sonra Belçikada (NATO-nun Müdafiə Kollecində, Brüssel Azad Universitetində) təhsil alıb.
Hikmət Hacıyev 2000-ci ildən Xarici İşlər Nazirliyi sistemində xidmət edib, Azərbaycanın NATO-dakı nümayəndəliyində, Küveytdəki səfirliyində çalışıb.
2008-ci ildən Hikmət Hacıyev Xarici İşlər Nazirliyinin Təhlükəsizlik Problemləri Departamentinin ikinci katibi vəzifəsini, 2011-ci ildən Azərbaycanın Misirdəki səfirliyində müşavir vəzifəsini tutub.
2013-cü ilin sentyabrından Xarici İşlər Nazirliyinin şöbə müdiri, 2014-cü ildən mətbuat xidmətinin rəhbəri olub.
Rus, türk, ingilis və fransız dillərini bilir.
