Jurnalist tətilinin tələbləri
Yunanıstanda jurnalistlər ölkə boyu tətil keçirir. Tətilin təşkilatçıları kütləvi informasiya vasitələri əməkdaşlarının həmkarlar ittifaqlarıdır.
Novator.az-ın məlumatına görə, tətil noyabrın 27-si səhər saat 6-da başlayıb. İstər dövlət, istərsə də özəl KİV-də çalışan jurnalistlər, İctimai Televiziyada, İnformasiya Məsələləri üzrə Baş Katiblikdə, dövlət qurumlarının mətbuat xidmətlərində fəaliyyət göstərən əməkdaşlar tətilə çıxıblar. Ölkənin radio və televiziyalarında xəbər buraxılışları yayımlanmır, saytların əksəri işləmir.
Tətil sosial tələblərlə keçirilir. KİV nümayəndələri kollektiv əmək müqavilələri əsasında hər kəsin sabit və bərabər hüquqlu işlə, yetərli maaşla, pulsuz səhiyyə ilə təmin olunmasını, sosial güzəştlərin, pensiyalara əlavələrin, bayram müavinətlərinin bərpa olunmasını istəyirlər. Bu məqsədə çatmaq üçün tətilçilər 2019-cu ilin dövlət büdcəsi layihəsinin dəyişdirilməsi tələbini də irəli sürürlər.
Tələblər sırasında borclu insanların hərrac yolu ilə satışa çıxarılan yeganə mənzilini əlində saxlamaq hüququnun tanınması da var.
Tətil noyabrın 28-i səhər saat 6-da bitməlidir.
Səidə Hüseynova
