İkinci tur ərəfəsində
Gürcüstanın Mərkəzi Seçki Komissiyası noyabrın 28-də keçiriləcək prezident seçkisinin 3703 məntəqədə təşkil olunacağını açıqlayıb. Novator.az-ın məlumatına görə, seçki məntəqələrinin 55-i xarici ölkələrdə yaradılıb.
Səhər saat 8-də başlayacaq səsverməni 48,5 min yerli, 1,3 min beynəlxalq müşahidəçi izləyəcək.
Səsvermə hüququ olan 3 milyon 528 min 658 nəfər qeydə alınıb.
Seçki prosesini 2,3 min jurnalist işıqlandıracaq.
Oktyabrın 28-də keçirilmiş ilk tura 25 namizəd qatılıb. İkinci tura sabiq xarici işlər nazirləri Salome Zurabişvili və Qriqol Vaşadzenin çıxıb. Müstəqil namizəd, hakim Gürcü Arzusu – Demokratik Gürcüstan Partiyasının dəstəklədiyi deputat Salome Zurabişvili ilk turda 38,6 faiz, Vahid Milli Hərəkat Partiyasının üzvü, “Güc birlikdədir” müxalif hərəkatının dəstəklədiyi Qriqol Vaşadze 37,7 faiz səs toplayıb.
1952-ci il təvəllüdlü Salome Zurabişvili 2004-2005-ci illərdə, 1958-ci il təvəllüdlü Qriqol Vaşadze 2008-2012-ci illərdə xarici işlər naziri olub.
Gürcüstanda 6 il müddətinə seçilən prezident dövlət başçısı funksiyasını yerinə yetirir, icra hakimiyyətinə isə baş nazir rəhbərlik edir.
