Hərbi vəziyyət haraları əhatə edir?
Ukrayna parlamenti – Ali Rada Milli Təhlükəsizlik və Müdafiə Şurasının təklifini, prezident Pyotr Poroşenkonun fərmanını nəzərə alaraq ölkənin bir hissəsində hərbi vəziyyət elan edilməsinə razılaşıb. Novator.az-ın məlumatına görə, noyabrın 26-sı axşam qəbul olunan qanunu Ali Radanın 276 deputatı dəstəkləyib.
Bir ay çəkəcək hərbi vəziyyət Çerniqov, Sumı, Xarkov, Luqansk, Donetsk, Zaporojye, Xerson, Nikolayev, Odessa, Vinnitsa vilayətlərini, Azov dənizi və Qara dənizdəki daxili suları əhatə edir.
Noyabrın 25-də Rusiya sərhədçiləri Ukraynanın üç hərbi gəmisini Azov dənizində əsir alıb. İnsident zamanı Ukraynanın 6 hərbi dənizçisi yaralanıb, 20-dən çoxu tutulub.
Rusiya 2014-cü ildə Ukraynanın Krım bölgəsini işğal edərək özünə birləşdirib, həmçinin Donetsk və Luqansk vilayətlərinin (Donbas bölgəsi) bir hissəsini işğal altında saxlayan separatçı rejimləri dəstəkləyir. Bu üç bölgədən 1,5 milyondan çox ukraynalı köçkün düşüb. Donbas bölgəsində 2014-cü ildən davam edən silahlı münaqişədə 10 mindən çox adam həlak olub.
