Büdcənin kəsir proqnozu 2 milyard manatı ötür
Noyabrın 27-də Milli Məclis 2019-cu ilin dövlət büdcəsi layihəsini ikinci oxunuşda qəbul edib. Novator.az bildirir ki, yenilənmiş layihədə gəlirlər 23 milyard 168 min manata, xərclər 25 milyard 190 milyon manata çatdırılıb. Büdcədə 2 milyard 22 milyon manatlıq kəsir proqnozlaşdırılır.
Başqa bir yeni layihəyə əsasən, Milli Məclisin saxlanma xərci 27 milyon 79,7 min manata qaldırılır.
Gələn ilin büdcə zərfinə Dövlət Sosial Müdafiə Fondunun büdcəsi haqqında, işsizlikdən sığorta fondunun büdcəsi haqqında, yaşayış minimumu haqqında, ehtiyac meyarının həddi haqqında, Hesablama Palatasının xərclər smetası haqqında layihələr də daxildir.
Dövlət Sosial Müdafiə Fondunun gəlirləri və xərcləri 3,9 milyard manat, işsizlikdən sığorta fondunun 2019-cu il büdcəsinin gəlirləri və xərcləri 83,4 milyon manat nəzərdə tutulur.
Layihəyə görə, 2019-cu il üçün yaşayış minimumu ölkə üzrə 180 manat, əmək qabiliyyətli əhali üçün 191 manat, pensiyaçılar üçün 149 manat, uşaqlar üçün 160 manat məbləğində müəyyən edilir.
Ünvanlı dövlət sosial yardımının təyin edilməsi məqsədilə 2019-cu il üçün ehtiyac meyarının həddi 143 manat məbləğində götürülür.
Hesablama Palatasının saxlanması üçün 4,4 milyon manat vəsait proqnozlaşdırılır.
