Ali məktəblərin hazırlıq qruplarında tədris qaydası təsdiqlənib
Nazirlər Kabineti ali təhsil müəssisələrinin hazırlıq qruplarında tədrisin təşkili qaydasını təsdiqləyib. Novator.az bildirir ki, qaydaya görə, Təhsil Nazirliyinin müəyyən etdiyi ali təhsil müəssisələri və ixtisaslar üzrə bakalavriat səviyyəsində birillik ödənişli hazırlıq qrupları təşkil olunur. Hazırlıq qruplarında təhsil əyani formada aparılır. Tədris ili iki semestrdən ibarətdir və oktyabr ayının 1-də başlayır.
Dərslər ali təhsil müəssisələrinə qəbul aparılan ixtisas qrupları üzrə imtahan fənlərini əhatə edən və Təhsil Nazirliyinin təsdiqlədiyi tədris planları əsasında aparılır.
Birinci semestrin sonunda tələbələrin biliyinin qiymətləndirilməsi və tədrisin keyfiyyətinin monitorinqi məqsədi ilə aralıq imtahanları keçirilir.
Hazırlıq qruplarında təhsil alan tələbələr ali təhsil müəssisəsinin daxili nizam-intizam qaydalarına riayət etməyə borcludurlar. Tələbə ali təhsil müəssisəsinin daxili intizam qaydalarını kobud şəkildə pozduqda və ya tədris aparıldığı semestrdə fənlər üzrə ayrılmış ümumi saatların 25 faizindən çoxunda iştirak etmədikdə ali təhsil müəssisəsinin hazırlıq qrupundan xaric olunur.
Hər qrupda tələbələrin sayı 20 nəfərdən çox olmamalıdır.
