Ukraynada hərbi vəziyyət rejimi tətbiq olunur
Ukraynanın Milli Təhlükəsizlik və Müdafiə Şurası ölkədə hərbi vəziyyət rejimi tətbiq etmək təklifi irəli sürüb. Novator.az-ın məlumatına görə, noyabrın 25-i prezident Pyotr Poroşenkonun iştirakı ilə keçirilən iclasda qəbul olunan qərar təsdiq üçün parlamentə göndərilib. Ali Rada qərar layihəsinə noyabrın 26-sı qapalı iclasda baxacaq.
Noyabrın 25-də Rusiya sərhədçiləri Ukraynanın Odessa limanından Mariupol limanına üzən üç hərbi gəmisini Azov dənizində əsir alıb. İnsident zamanı Ukraynanın 6 hərbi dənizçisi yaralanıb, 20-dən çoxu tutulub.
Ukrayna Silahlı Qüvvələri və təhlükəsizlik orqanları tam hərbi hazırlıq vəziyyətinə gətirilib.
Rusiya 2014-cü ildə Ukraynanın Krım bölgəsini işğal edərək özünə birləşdirib, həmçinin Donetsk və Luqansk vilayətlərinin (Donbas bölgəsi) bir hissəsini işğal altında saxlayan separatçı rejimləri dəstəkləyir. Bu üç bölgədən 1,5 milyondan çox ukraynalı köçkün düşüb. Donbas bölgəsində 2014-cü ildən davam edən silahlı münaqişədə 10 mindən çox adam həlak olub.
