Ukrayna prezidenti Rusiyaya tələb qoydu
Noyabrın 26-da Ukrayna prezidenti Pyotr Poroşenko Rusiya hakimiyyətinə müraciət edib. Novator.az-ın məlumatına görə, dövlət başçısı Azov dənizində saxlanmış Ukrayna gəmilərini və dənizçilərini dərhal azad buraxmağa çağırıb.
Rusiya sərhədçiləri noyabrın 25-də Ukraynanın Odessa limanından Mariupol limanına üzən üç hərbi gəmisini Azov dənizində əsir alıb. İnsident zamanı Ukraynanın 6 hərbi dənizçisi yaralanıb, 20-dən çoxu tutulub.
Ukrayna Silahlı Qüvvələri və təhlükəsizlik orqanları tam hərbi hazırlıq vəziyyətinə gətirilib. Milli Təhlükəsizlik və Müdafiə Şurası ölkədə hərbi vəziyyət rejimi tətbiq etmək təklifi irəli sürüb. Ali Rada bu təklifə noyabrın 26-sı qapalı iclasda baxacaq.
Rusiya hakimiyyətinə 26 noyabr müraciətində Pyotr Poroşenko hərbi gəmilərin və dənizçilərin dərhal Ukraynaya təhvil verilməsini, gərginliyin aradan qaldırılması üçün əməli addımlar atılmasını tələb edib. O, müraciətinə tez bir zamanda reaksiya gözlədiyini vurğulayıb.
Rusiya 2014-cü ildə Ukraynanın Krım bölgəsini işğal edərək özünə birləşdirib, həmçinin Donetsk və Luqansk vilayətlərinin (Donbas bölgəsi) bir hissəsini işğal altında saxlayan separatçı rejimləri dəstəkləyir. Bu üç bölgədən 1,5 milyondan çox ukraynalı köçkün düşüb. Donbas bölgəsində 2014-cü ildən davam edən silahlı münaqişədə 10 mindən çox adam həlak olub.
