Neft sammitinin gündəliyi
Azərbaycanın energetika naziri Pərviz Şahbazov dekabrın 6-sı Avstriyanın paytaxtı Vyanada iri neft ixracatçılarını birləşdirən OPEK-in Nazirlər Şurasının iclasında iştirak edəcək. AZƏRTAC-ın məlumatına görə, iclasda OPEK üzrə hasilatın azaldılması ilə bağlı qərar qəbulu gözlənir. Həmçinin neft bazarında baş verən proseslər nəzərdən keçiriləcək, ABŞ-ın İrana sanksiyaları fonunda neft bazarında tələb və təklifin vəziyyəti, cari ilin sonunda başa çatacaq Vyana razılaşmasından sonra da OPEK və qeyri-OPEK ölkələri arasında əməkdaşlığın davam etdirilməsi, Rusiyanın müşahidəçi ölkə kimi OPEK-ə qoşulması məsələləri müzakirə olunacaq.
2016-cı il noyabrın 30-da OPEK üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEK üzvləri ilə təşkilata daxil olmayan bəzi ölkələr, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. 2017-ci il mayın 25-də həmin sazişin müddətinin 2018-ci il aprelin 1-dək, 2017-ci il noyabrın 30-da 2019-cu il yanvarın 1-dək uzadılması barədə razılıq əldə olunub.
OPEK+ sazişinin iştirakçıları iyunun 23-ü Vyanada gündəlik hasilatı ümumilikdə 1 milyon barrel artırmaq barədə razılığa gəliblər. Razılaşma iyulun 1-dən tətbiq olunur.
Novator.az bildirir ki, OPEK-in 15 üzvü var: Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Qətər, Liviya, Nigeriya, Səudiyyə Ərəbistanı, Venesuela.
