Naxçıvanda 1,4 faizlik iqtisadi artım var
Naxçıvan Muxtar Respublikasının Dövlət Statistika Komitəsi 10 aylıq iqtisadi göstəriciləri açıqlayıb. AZƏRTAC-a verilən rəsmi məlumata görə, 2018-ci ilin yanvar-oktyabr aylarında muxtar respublikada 2 milyard 172,4 milyon manatlıq ümumi daxili məhsul istehsal olunub, bu da 2017-ci ilin müvafiq dövrü ilə müqayisədə 1,4 faiz çoxdur. Hər bir nəfərə düşən ümumi daxili məhsulun həcmi 4783 manata yaxınlaşıb.
Ümumi daxili məhsulun tərkibində ilk yeri sənaye sahəsi tutur. Sənaye üzrə 827,6 milyon manat dəyərində məhsul istehsal edilib. Bu, 2017-ci ilin müvafiq dövrünün göstəricisini 1,3 faiz üstələyib.
Yanvar-oktyabr aylarında 386,8 milyon manatlıq (2017-ci ilin müvafiq dövrü ilə müqayisədə 4,1 faiz çox) kənd təsərrüfatı məhsulları istehsal olunduğu bildirilir.
2018-ci ilin yanvar-oktyabr aylarında Azərbaycanın ümumi daxili məhsulu 0,8 faiz artaraq 65 milyard 233 milyon manata çatıb. Ötən ilin 10 ayı ilə müqayisədə iqtisadiyyatın qeyri-neft sektorunda 1 faiz, neft sektorunda 0,3 faiz artım qeydə alınıb.
