Ermənistanın 2019-cu il büdcəsi qəbul olundu
Noyabrın 22-də Ermənistan parlamenti 2019-cu ilin dövlət büdcəsi layihəsini qəbul edib. 66 deputat layihənin lehinə, 4 deputat əleyhinə səs verib, 2 deputat bitərəf qalıb.
Novator.az-ın məlumatına görə, büdcə sənədində gəlirlər 1 trilyon 490,6 milyard dram, xərclər 1 trilyon 642 milyard dram göstərilir (1 dollar 484 dramdır). Layihəyə əsasən, xərclərin 44 faizi sosial sahəyə və mədəniyyət sektoruna, 24 faizi müdafiə, təhlükəsizlik və ictimai asayişə, 12,3 faizi iqtisadi layihələrə, 9 faizi dövlət qurumları və yerli özünüidarəetmə orqanlarının saxlanmasına, 10 faizi dövlət borcunun ödənməsinə sərf olunacaq.
Ermənistan parlamenti noyabrın 1-də buraxılsa da, fəaliyyətini davam etdirir. Konstitusiyaya əsasən, növbədənkənar seçki motivi ilə buraxılan parlamentin səlahiyyət müddəti yeni parlamentin ilk iclası günü başa çatır. Həmin vaxta qədər köhnə parlament səlahiyyətlərinin icrasını tam şəkildə icra edə bilər.
Növbədənkənar parlament seçkisi dekabrın 9-da keçiriləcək.
