Separatçıların fiti
Azərbaycanın milli futbol komandası noyabrın 20-si Kosovo yığmasının qonağı olub. Priştina şəhərində keçirilən rəsmi beynəlxalq oyundan əvvəl stadion Azərbaycanın dövlət himnini fitə basıb. Novator.az qeyd edir ki, bu hörmətsizlik Azərbaycanın Kosovonu dövlət kimi tanımaması ilə bağlıdır.
1990-cı illərinin sonunda Serbiyanın muxtar diyarı olan Kosovonun mərkəzi hökumətlə problemləri yaranıb, araya qan düşüb. 1999-cu ildə separatçı bölgə NATO himayəsi altında olan beynəlxalq kontingentin nəzarətinə keçib.
2008-ci ilin fevralında Kosovo müstəqillik elan edib. Azərbaycan Kosovonu müstəqil dövlət kimi tanımayıb və sülhməramlı missiyada iştirak edən hərbi qulluqçularını oradan geri çağırıb.
Keçmiş SSRİ məkanından Rusiya, Belarus, Ukrayna, Ermənistan, Gürcüstan, Qazaxıstan, Qırğızıstan, Tacikistan, Türkmənistan, Özbəkistan da Kosovonu müstəqil dövlət kimi qəbul etmirlər.
İsrail, Hindistan, İran, İspaniya, Yunanıstan, Vatikan kimi dövlətlər də eyni mövqedədir.
ABŞ, Böyük Britaniya, Fransa, Almaniya, İtaliya, Türkiyə, Yaponiya, Kanada, Səudiyyə Ərəbistanı, Pakistan və sair dövlətlər Kosovonun müstəqilliyini tanıyıb. Hazırda Kosovonu müstəqil dövlət kimi tanıyan ölkələrin sayı 114-dür.
