Məhbus jurnalistin cəzası azaldılıb
Noyabrın 20-si həbsdə olan jurnalist Elçin İsmayıllının kassasiya şikayətinə baxılıb.
“Azadlıq” qəzetinin bölgə müxbiri, AXCP Ali Məclisinin üzvü Elçin İsmayıllı 2017-ci il fevralın 17-dən həbsdədir. O, İsmayıllı rayonunda tutulub. Sentyabrın 18-də Şəki Ağır Cinayətlər Məhkəməsi onu Cinayət Məcəlləsinin 182-ci (hədə-qorxu ilə tələb etmə), 308-ci (vəzifə səlahiyyətlərindən sui-istifadə) və 311-ci (rüşvət alma) maddələri ilə təqsirli bilərək 9 il müddətinə azadlıqdan məhrum edib.
2018-ci il fevralın 13-də Şəki Apellyasiya Məhkəməsi hökmü qüvvədə saxlayıb.
“Amerikanın səsi” xəbər verir ki, noyabrın 20-də Elçin İsmayıllının kassasiya şikayətinə Ali Məhkəmənin hakimi İmran Hacıqayıbovun sədrliyi ilə baxılıb.
Vəkil Elçin Sadıqov jurnalistin günahsız olduğunu bildirib. Vəkilin sözlərinə görə, zərərçəkənlər bundan öncə ifadə veriblər ki, Elçin İsmayıllı onlardan pul tələb etməyib və onlar özlərini zərərçəkmiş hesab etmirlər.
Prokuror Cövdət Mehraliyev israr edib ki, aşağı instansiya məhkəmələri jurnalistin günahını sübuta yetirib.
Sonda Ali Məhkəmə Elçin İsmayıllını yalnız Cinayət Məcəlləsinin 182-ci maddəsi üzrə təqsirli bilib. 308-ci və 311-ci maddələri üzrə itthamlar işdən çıxarılıb.
İki maddənin götürülməsi nəticəsində jurnalistin cəza müddəti 9 ildən 7 ilə endirilib.
Müdafiə tərəfi Avropa İnsan Hüquqları Məhkəməsinə şikayət vermək niyyətindədir.
