Kədərli sonluq
UEFA Millətlər Liqasının qrup mərhələsi başa çatıb. Novator.az-ın məlumatına görə, D divizionunun 3-cü qrupunda yarışan Azərbaycan milli komandası noyabrın 20-si Kosovoda ağır məğlubiyyətə düçar olub – 0:4. Qrup turnirini 14 xalla ilk sırada bitirən Kosovo C divizionuna yüksəlib. Azərbaycan 9 xal, Farer adaları 5 xal, Malta 3 xal əldə edib.
D divizionunun digər qalibləri Gürcüstan, Belarus və Makedoniyadır.
A divizionu qruplarının qalibləri Hollandiya, İsveçrə, Portuqaliya və İngiltərə 2019-cu ilin iyununda keçiriləcək final raunduna vəsiqə qazanıb.
B divizionundan Ukrayna, İsveç, Bosniya və Danimarka A divizionuna yüksəliblər.
Şotlandiya, Finlandiya, Norveç və Serbiya C divizionundan B divizionuna adlayıblar.
Millətlər Liqası 2020-ci ilin Avropa futbol çempionatının final mərhələsinə hər diviziondan bir vəsiqə verir. Bunun üçün 2020-ci ilin martında qrup qalibləri arasında əlavə matçlar keçiriləcək. Qrup qalibi Avropa çempionatına həmin turnirin özünün seçmə mərhələsindən düşərsə, onu Millətlər Liqasının növbəti ən yaxşı komandası əvəzləyəcək.
