Sərmayə: haradan gəlir, nəyə gedir?
2018-ci ilin yanvar-oktyabr aylarında xarici müəssisə və təşkilatlar Azərbaycana 4 milyard 354,6 milyon manat sərmayə qoyub. Novator.az-ın məlumatına görə, Dövlət Statistika Komitəsi bildirir ki, xarici ölkələr və beynəlxalq təşkilatların əsas kapitala yönəltdiyi vəsaitin 80,8 faizi Böyük Britaniya, İsveçrə, Türkiyə, Malayziya, ABŞ, Yaponiya, Rusiya, İran və Çexiya sərmayədarlarının payına düşüb.
Hesabata əsasən, yanvar-oktyabr aylarında ölkənin iqtisadi və sosial sahələrinin inkişafı üçün əsas kapitala 11 milyard 482,7 milyon manat vəsait yönəldilib. Daxili mənbələrdən əsas kapitala yönəldilmiş vəsaitin dəyəri ümumi sərmayənin 62,1 faizini təşkil edib.
10 ayda əsas kapitala yönəldilmiş ümumi vəsaitin 53,7 faizi sənaye, 21 faizi tikinti, 12,7 faizi nəqliyyat və anbar təsərrüfatı, 3 faizi dövlət idarəetməsi və müdafiə; sosial təminat, 2,7 faizi kənd təsərrüfatı, meşə təsərrüfatı və balıqçılıq, 2,3 faizi informasiya və rabitə, 1,4 faizi təhsil, 1,3 faizi səhiyyə, 0,6 faizi ticarət; nəqliyyat vasitələrinin təmiri, hər birində 0,4 faiz olmaqla inzibati və yardımçı xidmətlərin göstərilməsi, istirahət, əyləncə və incəsənət sahəsində fəaliyyət, 0,3 faizi turistlərin yerləşdirilməsi və ictimai iaşə, hər birində 0,1 faiz olmaqla isə maliyyə və sığorta fəaliyyəti və digər sahələrdə xidmətlərin göstərilməsi sahələrinə sərf olunub.
