Əli Kərimli məhkəmə qarşısında
Noyabrın 19-u Səbail Rayon Məhkəməsində AXCP sədri Əli Kərimli və partiyadaşlarının işi üzrə proses keçirilir.
AXCP üzvləri və təəssübkeşləri noyabrın 17-də – Milli Dirçəliş Günündə Bakıdakı Şəhidlər xiyabanını ziyarət etmək istəyib. Parlament prospektində polis onları saxlayıb. 52 nəfər, o cümlədən AXCP sədri Əli Kərimli, Demokratik Qüvvələrin Milli Şurasının sədri Cəmil Həsənli tutularaq Səbail Rayon Polis İdarəsinə gətirilib. 41 nəfər xəbərdarlıq edilərək buraxılıb, Əli Kərimli və daha 10 nəfər barəsində İnzibati Xətalar Məcəlləsinin 513.1 və 513.2-ci maddələri ilə protokollar tərtib olunub, toplanmış materiallar Səbail Rayon Məhkəməsinə göndərilib.
Novator.az bildirir ki, İnzibati Xətalar Məcəlləsinin 513.1-ci maddəsinə əsasən, yığıncaqların, mitinqlərin, nümayişlərin, küçə yürüşlərinin və piketlərin təşkili və keçirilmə qaydasının pozulmasına görə fiziki şəxslər min beş yüz manatdan üç min manatadək məbləğdə cərimə edilir, yaxud iki yüz saatdan iki yüz qırx saatadək ictimai işlər və ya iki ayadək müddətə inzibati həbs tətbiq olunur, vəzifəli şəxslər üç min manatdan altı min manatadək məbləğdə, hüquqi şəxslər on beş min manatdan otuz min manatadək məbləğdə cərimələnir.
513.2-ci maddəyə əsasən, “Sərbəst toplaşmaq azadlığı haqqında” qanunla müəyyən edilmiş qaydada təşkil edilməyən yığıncaq, mitinq, nümayiş, küçə yürüşü və ya piketdə iştirak etməyə görə üç yüz manatdan altı yüz manatadək məbləğdə cərimə tətbiq edilir, yaxud yüz altmış saatdan iki yüz saatadək ictimai işlər və ya iki ayadək müddətə inzibati həbs tətbiq olunur.
Əli Kərimli 1965-ci ildə anadan olub. 1991-ci ildə Bakı Dövlət Universitetinin hüquq fakültəsini bitirib. Əbülfəz Elçibəy hakimiyyəti zamanı Prezident Aparatında ərazi idarəetmə orqanları ilə iş şöbəsinin müdiri vəzifəsində çalışıb, daha sonra dövlət katibi təyin olunub.
1993-cü ildən AXC sədrinin siyasi məsələlər üzrə müavini, daha sonra AXCP sədrinin birinci müavini olub. 1995 və 2000-ci illərdə Milli Məclisin deputatı seçilib. 2000-ci ildən AXCP-yə rəhbərlik edir.
