Məsələ son tura qaldı
UEFA Millətlər Liqasının qrup mərhələsində beşinci tur başa çatıb. D divizionunun 3-cü qrupunda yarışan Azərbaycan milli komandası noyabrın 17-si Bakıda Farer adaları yığmasını 2:0 hesabı ilə yenib.
Malta – Kosovo görüşü 0:5 hesabı ilə başa çatıb.
Novator.az-ın məlumatına görə, sona bir tur qalmış qrupa 11 xalla Kosovo başçılıq edir. Azərbaycanın 9, Farer adalarının 4, Maltanın 2 xalı var. Azərbaycan sonuncu matçı noyabrın 20-si Kosovoda keçirəcək. Həmin gün Malta Farer adalarını qəbul edəcək.
Millətlər Liqası 2020-ci ilin Avropa futbol çempionatının final mərhələsinə hər diviziondan bir vəsiqə verir. Bunun üçün divizionlardakı qrup qalibləri arasında yarımfinal və final matçları keçiriləcək. Qrup qalibi Avropa çempionatına həmin turnirin özünün seçmə mərhələsindən düşərsə, onu Millətlər Liqasının növbəti ən yaxşı komandası əvəzləyəcək.
A divizionundakı dörd qrup qalibi Millətlər Liqasının 2019-cu ilin iyununda keçiriləcək final mərhələsinə vəsiqə qazanacaq. Bu raund yarımfinallar, üçüncü yer uğrunda oyun və finaldan ibarətdir.
B, C və D divizionlarının qrup qalibləri yuxarı diviziona çıxacaq, A, B və C divizionlarının qruplarında zəiflər aşağı diviziona düşəcək.
