Paşinyan hücum təlimində
Ermənistan hökumətinin başçısı Nikol Paşinyan noyabrın 16-da ordunun Azərbaycanla sərhəddəki dayaq məntəqələrindən birinə baş çəkərək hücum xarakterli taktiki təlimi izləyib. Novator.az-ın məlumatına görə, dağ massivində keçirilən təlimdə hücum qrupunun yeni mövqelər ələ keçirməsi məşq edilib.
Təlimdən sonra Nikol Paşinyan hərbi qulluqçularla söhbətləşib, onlara hədiyyələr verib.
Nikol Paşinyan bu il mayın 8-də Ermənistanın baş naziri postunu tutub, oktyabrın 16-dan istefadadır, ancaq səlahiyyətlərinin icrasını davam etdirir.
İstefa növbədənkənar parlament seçkisi planının tərkib hissəsi olub. Baş nazir istefa verdikdən sonra iki həftə ərzində hökumətin yeni başçısı seçilmədiyi üçün noyabrın 1-də parlament konstitusiyanın hökmü ilə buraxılıb. Növbədənkənar parlament seçkisi dekabrın 9-da keçiriləcək.
1988-ci ilin fevralında Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ilin mayında atəşkəslə dayanan müharibədə Ermənistan Dağlıq Qarabağı və onun ətrafındakı 7 rayonu işğal edib.
