Dördillik proqramda nələr var?
Prezident İlham Əliyev peyk vasitəsilə Yerin məsafədən müşahidəsi xidmətlərinin inkişafı proqramını təsdiqləyib. Novator.az-ın məlumatına görə, 2019-2022-ci illərə aid dövlət proqramının məqsədinin “Azərkosmos” Açıq Səhmdar Cəmiyyətinin peyk vasitəsilə məsafədən müşahidə xidmətlərinin inkişafı, peyk müşahidəsi vasitəsilə əldə olunan təsvirlərin və əlaqəli informasiya məhsullarının dövriyyəsinin artırılması, mərkəzi və yerli icra hakimiyyəti orqanlarında dövlət idarəetməsi üçün mütərəqqi imkanlardan aktiv istifadənin təşviqi, peyk təsvirlərindən faydalanmaqla müxtəlif sahələrdə yeni gərəkli xidmətlər göstərilməsinə şərait yaradılması olduğu bəyan edilib.
Dövlət başçısı proqramda nəzərdə tutulmuş tədbirlərin icrasını əlaqələndirməyi “Azərkosmos” Açıq Səhmdar Cəmiyyətinə tapşırıb.
Proqramın əsas vəzifələri belə sıralanır: “Azersky” və digər yüksək ayırdetməli məsafədən Yerin müşahidəsi peyklərinin resurslarından optimal istifadə edilməsi; peyk təsvirlərindən istifadə etməklə müxtəlif sahələrdə iqtisadi dəyər yaradılması və kommersiya faydasının əldə edilməsi üçün iqtisadi və texnoloji mühitin formalaşdırılması; peyk təsvirlərindən istifadə etməklə dövlət orqanlarının (qurumlarının) fəaliyyətinin səmərəliliyinin artırılmasına dəstək verilməsi; peyk təsvirlərindən istifadə etməklə elmi tədqiqatların səmərəliliyinin artırılması; peyk təsvirlərinin emalı və satışı sahəsində ixrac potensialının genişləndirilməsi.
Sənədə əsasən, nəzərdə tutulan tədbirlər müvafiq illər üzrə dövlət büdcəsində aidiyyəti icraçı dövlət orqanları (qurumları) üçün nəzərdə tutulmuş vəsait və qanunla qadağan olunmayan digər mənbələr hesabına maliyyələşdirilir.
