Xələf Xələfova yeni status verildi
Xarici işlər nazirinin müavini Xələf Xələfov Xəzər dənizi məsələləri üzrə Yüksək Səviyyəli İşçi Qrupda Azərbaycanın səlahiyyətli nümayəndəsi təyin edilib. Sərəncamı prezident İlham Əliyev noyabrın 14-də imzalayıb.
Bu il avqustun 12-də Qazaxıstanın Aktau şəhərində Xəzəryanı dövlətlərin zirvə toplantısı keçirilib. Azərbaycan prezidenti İlham Əliyev, Rusiya prezidenti Vladimir Putin, Qazaxıstan prezidenti Nursultan Nazarbayev, Türkmənistan prezidenti Qurbanqulu Berdiməhəmmədov və İran prezidenti Həsən Ruhani toplantıda Xəzər dənizinin hüquqi statusu haqqında konvensiya imzalayıblar. Konvensiyanın səmərəli yerinə yetirilməsi məqsədilə səlahiyyətli nümayəndələrdən ibarət beştərəfli məsləhətləşmə mexanizminin yaradılması barədə qərar qəbul edilib. Həmin qərara uyğun olaraq Xəzəryanı dövlətlərin xarici işlər nazirləri Xəzər dənizi məsələləri üzrə Yüksək Səviyyəli İşçi Qrup yaradıblar.
Novator.az bildirir ki, Xələf Xələfov 1959-cu ildə Ermənistanda anadan olub. 1982-ci ildə Kiyev Dövlət Universitetini, 1991-ci ildə SSRİ Xarici İşlər Nazirliyinin Diplomatik Akademiyasını bitirib.
1983-1990-cu illərdə Azərbaycanın Daxili İşlər Nazirliyində çalışıb.
1991-ci ildən Azərbaycan Xarici İşlər Nazirliyinin Konsulluq İdarəsinin 2-ci katibi, 1992-ci ildən Müqavilə-Hüquq İdarəsinin rəisi olub.
1997-ci ildən xarici işlər nazirinin müavinidir.
