İxrac idxalı 6,7 milyard dollar üstələyir
2018-ci ilin yanvar-oktyabr aylarında Azərbaycanın ticarət əməliyyatlarının həcmi 25 milyard 223,9 milyon dollar olub. Novator.az-ın məlumatına görə, Dövlət Gömrük Komitəsinin 10 aylıq hesabatında ixracın həcmi 15 milyard 971,3 milyon dollar, idxalın həcmi 9 milyard 252,5 milyon dollar göstərilir.
Hesabat dövründə 178 ölkə ilə ticarət əməliyyatı aparılıb, gömrük orqanları büdcəyə 2 milyard 978,5 milyon manat ödəyib.
Yanvar-oktyabr aylarında ixracın 80,9 faizi xam neft və xam neft məhsulları, 2,8 faizi neft məhsulları, 7,6 faizi təbii qaz olub.
İxracın 2,5 faizinin meyvə-tərəvəz olduğu açıqlanıb.
İdxalın 22,6 faizi maşın, mexanizm, elektrik aparatları, avadanlıqlar və onların hissələri, 12 faizi yeyinti məhsulları, 11,1 faizi qara metallar və onlardan hazırlanan məmulatlar, 7,7 faizi nəqliyyat vasitələri və onların hissələri, 3,2 faizi plastmassa və ondan hazırlanan məmulatlar, 2,6 faizi əczaçılıq məhsulları, 2,6 faizi oduncaq və ondan hazırlanan məmulatlar, 1,2 faizi tütün və tütün məmulatları kimi rəsmiləşib.
10 ayda ixracın 5,4 faizi MDB ölkələrinin, 53,9 faizi Avropa İttifaqı ölkələrinin, 40,7 faizi digər ölkələrin payına düşüb.
İdxalda MDB-nin payı 24,6 faiz, Avropa İttifaqının payı 20,5 faiz, digər ölkələrin payı 54,9 faiz göstərilir.
Əsas tərəfdaş İtaliya olub. Bu ölkə ilə ticarət 10 aylıq dövriyyənin 18,6 faizi həcmində rəsmiləşib.
Türkiyə 11 faizlə ikinci, Rusiya 7,9 faizlə üçüncüdür.
İxracda əsas ölkə kimi İtaliya (27,7 faiz) göstərilir, idxalda isə Rusiya (16 faiz) birinci sırada qərar tutub.
