Gürcüstanda ikinci tur təyin olundu
Gürcüstanın Mərkəzi Seçki Komissiyası oktyabrın 28-də keçirilmiş prezident seçkisinin nəticələrini təsdiqləyib. Novator.az-ın məlumatına görə, 25 namizədin qatıldığı seçkidə ikinci tura sabiq xarici işlər nazirləri Salome Zurabişvili və Qriqol Vaşadzenin çıxdığı bəyan edilib. İkinci tur noyabrın 28-nə təyin olunub.
Müstəqil namizəd, hakim Gürcü Arzusu – Demokratik Gürcüstan Partiyasının dəstəklədiyi deputat Salome Zurabişvili ilk turda 38,6 faiz, Vahid Milli Hərəkat Partiyasının üzvü, “Güc birlikdədir” müxalif hərəkatının dəstəklədiyi Qriqol Vaşadze 37,7 faiz səs toplayıb.
1952-ci il təvəllüdlü Salome Zurabişvili 2004-2005-ci illərdə, 1958-ci il təvəllüdlü Qriqol Vaşadze 2008-2012-ci illərdə xarici işlər naziri olub.
Gürcüstanda 6 il müddətinə seçilən prezident dövlət başçısı funksiyasını yerinə yetirir, icra hakimiyyətinə isə baş nazir rəhbərlik edir.
