Bakının yeni icra başçısı
Noyabrın 15-də prezident İlham Əliyev Eldar Əzizovu Bakı Şəhər İcra Hakimiyyətinin başçısı təyin edib.
Novator.az bildirir ki, Eldar Əzizov 1957-ci il iyunun 28-i Bakı şəhərində anadan olub. 1979-cu ildə indiki Bakı Dövlət Universitetinin tarix fakültəsini bitirib. Həmin ildən Azərbaycan Komsomolu Mərkəzi Komitəsində müxtəlif məsul vəzifələr tutub.
1984-cü ildən 26 Bakı Komissarları Rayon Komsomol Komitəsinin birinci katibi, 1987-ci ildən Bakı Şəhər Komsomol Komitəsinin birinci katibi olub.
1989-cu ildən Azərbaycan Komsomolu Mərkəzi Komitəsinin katibi, 1991-ci ildən Azərbaycan Gənclər İttifaqı Mərkəzi Komitəsinin katibi vəzifələrində işləyib.
1998-ci ildən Mərkəzi Seçki Komissiyasında beynəlxalq əlaqələr şöbəsinin müdiri, 1999-cu ildən Bakı Şəhər İcra Hakimiyyətində xarici əlaqələr və investisiya proqramları departamenti sədrinin birinci müavini, 2000-ci ilin mart ayından Bakı Şəhər İcra Hakimiyyəti başçısının müavini postlarında çalışıb.
2000-ci ilin iyun ayından Nizami Rayon İcra Hakimiyyətinin (Bakı) başçısı, 2003-2011-ci illərdə Gəncə Şəhər İcra Hakimiyyətinin, 2011-2015-ci illərdə Sumqayıt Şəhər İcra Hakimiyyətinin, 2015-ci ilin sentyabr ayından Səbail Rayon İcra Hakimiyyətinin başçısı olub.
Bu il iyulun 16-da Eldar Əzizov Bakı Şəhər İcra Hakimiyyəti başçısının müavini təyin olunub, həmin vaxtdan başçının səlahiyyətlərini də icra edib.
Bakı Şəhər İcra Hakimiyyətinin başçısı postu bu il aprelin 21-dən boş idi. 2001-ci ildən icra başçısı olan Hacıbala Abutalıbov həmin gün baş nazirin müavini postuna təyinat alıb.
