Gözəl Bayramlının cəzası azaldıldı
Noyabrın 14-də Ali Məhkəmə AXCP sədrinin müavini Gözəl Bayramlının kassasiya şikayətinə baxılıb. Azadliq.info-nun məlumatına görə, prosesdə siyasətçinin həbs cəzasının iki ay azaldılması qərarı çıxarılıb. Bu, Gözəl Bayramlıya verilmiş qaçaqmalçılıq ittihamının qaçaqmalçılığa cəhd ittihamı ilə dəyişdirilməsi nəticəsində mümkün olub.
Gözəl Bayramlı 2017-ci il mayın 25-də Gürcüstandan Azərbaycana gələrkən Qazax rayonunda tutulub. Rəsmi məlumata görə, siyasətçinin üstündən bəyan edilməmiş 12 min ABŞ dolları çıxıb. Gözəl Bayramlı isə bu pulun sərhəd-buraxılış məntəqəsində onun çantasına atıldığını söyləyir.
Qaçaqmalçılıqda ittiham olunan Gözəl Bayramlı 2018-ci il yanvarın 23-də Qazax Rayon Məhkəməsinin hökmü ilə 3 il müddətinə azadlıqdan məhrum edilib. Bu il aprelin 20-də Gəncə Apellyasiya Məhkəməsi həmin hökmü qüvvədə saxlayıb.
