“Azadlıq” qəzetinin ofisi yarılıb
“Azadlıq” qəzetinin Bakıda, “Azərbaycan” nəşriyyatının 9-cu mərtəbəsində yerləşən ofisindən oğurluq edilib. Nəşrin redaktoru Rövşən Hacıbəyli “Azadlıq” radiosuna deyib ki, ofisin qapısı sındırılıb, “Azərbaycan saatı” televiziya proqramının kamerası, eləcə də qəzetin müxtəlif illərdə çıxan saylarının nüsxələri oğurlanıb.
1989-cu ildə yaradılan “Azadlıq” qəzeti bank əməliyyatı aparmaqdan məhrum olduğu üçün 2016-cı il sentyabrın 5-də çapını dayandırıb. 2017-ci il mayın 12-də isə Səbail Rayon Məhkəməsi qəzetin Azadliq.info saytına girişi məhdudlaşdıran qərar qəbul edib. Bakı Apellyasiya Məhkəməsi və Ali Məhkəmə həmin qərarı qüvvədə saxlayıb.
Qəzetin Fransada mühacirətdə olan baş redaktoru Qənimət Zahid xaricdən yayımlanan “Azərbaycan saatı” televiziya proqramının aparıcısıdır.
Noyabrın 14-də “Azadlıq” radiosuna danışan Rövşən Hacıbəyli deyib ki, qəzetin “Azərbaycan” nəşriyyatındakı ofisinin bir otağında “Azərbaycan saatı” proqramının çəkilişləri aparılır: “Həmin otaqdan 8-ci mərtəbədəki akt zalına qapı var. O qapını sındırıb içəri giriblər. Nəşriyyatın məsul işçilərinə və akt zalında təmir aparan briqadanın rəhbərliyinə məlumat vermişik. Hüquq mühafizə orqanlarına şikayət etmək niyyətindəyik”.
