“Qarabağ”ın 1/16 final ümidi
UEFA Avropa Liqasının qrup raundunda sona iki tur qalır. E qrupunda yarışan Azərbaycan təmsilçisi “Qarabağ” ilk dövrədə Portuqaliya “Sportinq”inə 0:2 (səfərdə), “Arsenal”a (İngiltərə) 0:3, “Vorskla”ya (Ukrayna) 0:1 (hər ikisi evdə) uduzub. İkinci dövrənin ilk oyununda “Qarabağ” səfərdə “Vorskla”nı 1:0 hesabı ilə yenib.
1/16 finala qrupda ilk iki yeri tutan komandalar çıxır. 10 xal yığan “Arsenal” növbəti raunda vəsiqəni təmin edib. “Sportinq”in 7, “Vorskla” və “Qarabağ”ın 3 xalı var.
Noyabrın 29-na təyin olunan beşinci turda “Qarabağ” “Sportinq”i, “Vorskla” “Arsenal”ı qəbul edəcək. Qrup turnirinə dekabrın 13-də “Arsenal” – “Qarabağ” və “Sportinq” – “Vorskla” oyunları ilə yekun vurulacaq.
Ağdam klubunun növbəti mərhələyə çıxmaq şansını dəyərləndirən futbol icmalçısı Rasim Mövsümzadə Novator.az-a deyib ki, 1/16 finala yüksəlmək üçün “Qarabağ” qalan iki oyunda (o cümlədən Londonda!) maksimum nəticə göstərməli, yəni 6 xal qazanmalıdır: “Ağdamlıların ikinci yer uğrunda mübarizədə əsas rəqibi “Sportinq”in, həmçinin “Vorskla”nın qalan oyunlarda xal itirmələri də şərtdir.
Bakıda “Sportinq”ə qalib gəlib, Londonda “Arsenal”la heç-heçə oynayıb 7 xalla da ikinci yeri tutmaq mümkündür. Amma bunun üçün “Qarabağ” Bakıda “Sportinq”i 2:0 və daha böyük hesabla yenməli, “Vorskla” isə “Arsenal”a uduzmalı və səfərdə “Sportinq”ə böyük hesabla qalib gəlməlidir”.
| E qrupu | Q | H | M | T | X |
| “Arsenal” | 3 | 1 | 0 | 8-2 | 10 |
| “Sportinq” | 2 | 1 | 1 | 4-2 | 7 |
| “Vorskla” | 1 | 0 | 3 | 4-7 | 3 |
| “Qarabağ” | 1 | 0 | 3 | 1-6 | 3 |
