Sükut 8 ayı haqladı
ABŞ dollarının rəsmi qiymətində sabitlik 8 ayı haqlayıb. Noyabrın 7-də Mərkəzi Bank dolları yenə 1,7 manata satır. Bu kurs martın 7-dən dəyişmir.
Novator.az bildirir ki, 2015-ci ildə dolların rəsmi kursu 0,7844 manatdan 1,5594 manata qalxıb. 2016-cı ilə 1,7707 manatla nöqtə qoyulub. 2017-ci il 1,7001 manatla başa çatıb və həmin kurs 2018-ci il martın 7-dək qüvvədə olub.
Digər valyutaların 7 noyabr qiymətlərinə gəlincə, avro (1,9478 manat) və ingilis funt sterlinqi (2,2319 manat) bahalaşıb, gürcü larisi 0,6183, türk lirəsi 0,3176 manata düşüb.
Rusiya rublunun kursu isə 0,0257 manat həddində saxlanıb (Tam siyahı).
Bu ilin 10 ayında Dövlət Neft Fondu Mərkəzi Bankın manatı qorumaq üçün keçirdiyi valyuta hərraclarında 5 milyard 129,2 milyon ABŞ dolları dəyərində vəsait satıb. Yanvarın hərraclarında fonddan 299,1 milyon dollar, fevralın hərraclarında 364,1 milyon dollar, martın hərraclarında 647 milyon dollar, aprelin hərraclarında 802,6 milyon dollar, mayın hərraclarında 422,7 milyon dollar, iyunun hərraclarında 439 milyon dollar, iyulun hərraclarında 536,6 milyon dollar, avqustun hərraclarında 733,7 milyon dollar, sentyabrın hərraclarında 394,8 milyon, oktyabrın hərraclarında 489,6 milyon dollar məbləğində vəsait alınıb.
Noyabrın 1-nə Mərkəzi Bankın valyuta ehtiyatının həcmi 5 milyard 536,4 milyon dollar göstərilib.
