Sədr kollegiyaya da rəhbərlik edəcək
Qida Təhlükəsizliyi Agentliyi Kollegiyasının tərkibi təsdiqlənib. Prezident İlham Əliyevin 6 noyabr sərəncamı ilə kollegiyaya Qida Təhlükəsizliyi Agentliyinin sədri rəhbərlik edəcək.
Kollegiyanın üzvləri belə müəyyənləşib: Qida Təhlükəsizliyi Agentliyi sədrinin müavinləri; Naxçıvan Muxtar Respublikasının aidiyyəti icra hakimiyyəti orqanının rəhbəri; Qida Təhlükəsizliyi Agentliyi Aparatının rəhbəri; Qida Təhlükəsizliyi Agentliyinin Bakı şəhəri üzrə 1 saylı Regional Bölməsinin rəisi; “Azərbaycan Qida Təhlükəsizliyi İnstitutu” publik hüquqi şəxsin İdarə Heyətinin sədri; Qida Təhlükəsizliyi Agentliyi Aparatının qida təhlükəsizliyi şöbəsinin müdiri; Qida Təhlükəsizliyi Agentliyi Aparatının hüquq, kadr və icraya nəzarət şöbəsinin müdiri; Qida Təhlükəsizliyi Agentliyi Aparatının idxal və ixraca nəzarət şöbəsinin müdiri.
Novator.az bildirir ki, 2017-ci ildə yaradılan Qida Təhlükəsizliyi Agentliyi qida məhsullarının təhlükəsizliyinə, baytarlıq və fitosanitar nəzarətinə dair normativ tənzimləməni, qida təhlükəsizliyi sahəsində fəaliyyət göstərən subyektlərin qeydiyyatını, qida təhlükəsizliyi, fitosanitar və baytarlıq sertifikatlarının verilməsini, qida məhsullarının ilkin istehsalı, tədarükü, istehsalı, emalı, qablaşdırılması, saxlanması, daşınması, dövriyyəsi (o cümlədən idxal-ixrac əməliyyatları) daxil olmaqla qida zəncirinin bütün mərhələlərində qida məhsullarının təhlükəsizliyinə, həmçinin qida məhsullarının, dövlət baytarlıq və fitosanitar nəzarətində olan yüklərin istehlakçılarının hüquqlarının müdafiəsinə dövlət nəzarətini, habelə qeyd olunan sahələrdə dövlət siyasətini və tənzimləməsini həyata keçirən mərkəzi icra hakimiyyəti orqanıdır.
Quruma Qoşqar Təhməzli sədrlik edir. 1970-ci il təvəllüdlü Qoşqar Təhməzli Azərbaycan Dövlət Tibb İnstitutunun sanitariya və gigiyena fakültəsini və Qərb Universitetinin ümumbəşər siyasət və iqtisadiyyat fakültəsini bitirib.
Tibb elmləri üzrə fəlsəfə doktorudur. 2017-ci il dekabrın 25-dən Qida Təhlükəsizliyi Agentliyinin sədridir.
