İnnovasiyalar Agentliyi yaradılır
Nəqliyyat, Rabitə və Yüksək Texnologiyalar Nazirliyinin tabeliyində olan İnformasiya Texnologiyalarının İnkişafı Dövlət Fondunun və “Yüksək Texnologiyalar Parkı” Məhdud Məsuliyyətli Cəmiyyətinin əsasında İnnovasiyalar Agentliyi yaradılır. Novator.az-ın məlumatına görə, prezident İlham Əliyev noyabrın 6-da belə fərman imzalayıb.
İnnovasiyalar Agentliyinin statusu yerli sahibkarlıq subyektlərinə müasir texnologiyaların və texnoloji həllərin əldə olunmasında yardım göstərən və onların transferini təşkil edən, innovasiya yönümlü elmi tədqiqatları dəstəkləyən, innovativ layihələri (o cümlədən startapları) təşviq edən, onları qrant, güzəştli kredit və nizamnamə kapitalına sərmayə (o cümlədən vençur maliyyələşməsi) vasitəsilə maliyyələşdirən, innovasiya təşəbbüskarlığını təbliğ edən publik hüquqi şəxs kimi müəyyən edilib.
Qurumun nizamnaməsinin və strukturunun təsdiqi, icra orqanının yaradılması prezidentin səlahiyyətindədir. Nəqliyyat, Rabitə və Yüksək Texnologiyalar Nazirliyi agentliyin nizamnaməsinin və strukturunun layihələrini bir ay müddətində hazırlamalıdır.
