Cahangir Hacıyevin həyat yoldaşı tutulub
Beynəlxalq Bankın İdarə Heyətinin sabiq sədri, məhbus Cahangir Hacıyevin həyat yoldaşı Zamirə Hacıyevanın Böyük Britaniyanın paytaxtında həbs edildiyi açıqlanıb. Məlumatlara görə, qərarı ötən həftə Londonda ilkin məhkəmə çıxarıb. Zamirə Hacıyevanın Azərbaycanın hüquq mühafizə orqanlarının müraciəti əsasında tutulduğu bildirilir.
Novator.az xatırladır ki, 2015-ci ilin dekabr ayında Azərbaycanda həbs olunan Cahangir Hacıyev 15 il müddətinə azadlıqdan məhrum edilib. İttihama əsasən, 2001-2015-ci illərdə Beynəlxalq Bankın İdarə Heyətinin sədri vəzifəsində işləmiş Cahangir Hacıyev digər şəxslərlə qabaqcadan əlbir olaraq mütəşəkkil qrup yaradıb və həmin qrupa rəhbərlik edib, qulluq mövqeyindən sui-istifadə edərək özünün, ailə üzvlərinin və digər şəxslərin adına kart hesabları açıb və həmin hesablara külli miqdarda pul vəsaitlərinin köçürülməsi barədə qanunsuz göstərişlər verib. Qeyd olunur ki, Cahangir Hacıyev və cinayətin digər iştirakçıları Müşahidə Şurasının qərarı olmadan Beynəlxalq Bankın filiallarında bir çox fiziki şəxsin adına kredit pullarını rəsmiləşdirərək mənimsəyiblər, Beynəlxalq Banka 211 milyon manatdan çox ziyan vurublar.
Cahangir Hacıyevin həyat yoldaşı Zamirə Hacıyeva da iş üzrə təqsirləndirilən şəxs qismində cəlb olunub. Barəsində həbs qətimkan tədbiri seçilən Zamirə Hacıyeva axtarışa verilib.
Bu yaxınlarda Böyük Britaniyanın Cinayətkarlıqla Mübarizə Milli Agentliyi Zamirə Hacıyevadan sərvətinin mənbəyini açıqlamağı tələb edib. Zamirə Hacıyevanın Londonda bahalı ev alması, külli miqdarda pul xərcləməsi Britaniya hüquq mühafizə orqanlarına şübhəli görünüb, onun zinət əşyaları müsadirə olunub, hesabları dondurulub.
