Prokuror Fədayə Laçına 6 il iş istəyir
Bakı Ağır Cinayətlər Məhkəməsində məhbusların qaçmasına kömək göstərməkdə təqsirləndirilən müğənni Fədayə Laçının (Məmmədova) və başqa şəxslərin işi üzrə proses davam edir.
2017-ci il oktyabrın 23-də Astaradan Bakıya etap olunan məhbuslar Etibar Ələkbər oğlu Məmmədov və Əli Rasim oğlu Ağami Biləcəri qəsəbəsi ərazisində xüsusi təyinatlı vaqondan qaçıb. Əli Ağami qaçışdan üç gün sonra – oktyabrın 26-da Şirvan şəhərində həbs olunub, Etibar Məmmədov isə həmin il noyabrın 2-nə keçən gecə Bakının Qaradağ rayonunda keçirilmiş xüsusi əməliyyatda öldürülüb.
Məhkumların qaçmasına yardım etməkdə təqsirləndirilən bəzi şəxslər, o cümlədən Penitensiar Xidmətin bir neçə əməkdaşı, Etibar Məmmədovun dostu Fədayə Laçın tutulub.
Report.az-ın məlumatına görə, 2018-ci il noyabrın 5-i Bakı Ağır Cinayətlər Məhkəməsində keçirilən prosesdə dövlət ittihamçısı başqa iş üzrə də təqsirli bilinən Əli Ağaminin 20 il müddətinə azadlıqdan məhrum edilməsini istəyib.
Prokuror Fədayə Laçına 6 il, digər şəxslərə 7-10 il arası həbs cəzası verilməsini təklif edib.
Fədayə Məmmədova 1977-ci ildə Laçın şəhərində anadan olub.
