Paşinyan məzuniyyətini Qarabağda keçirib
Ermənistanın baş nazir əvəzi Nikol Paşinyan qısamüddətli məzuniyyətini Azərbaycanın Dağlıq Qarabağ bölgəsində keçirib. Novator.az bildirir ki, noyabrın 5-də yayılan məlumata görə, Nikol Paşinyan Xankəndi şəhərində işğalçı Dağlıq Qarabağ rejiminin başçısı Bako Saakyanla birgə hərbi müşavirə aparıb. Müşavirəyə Ermənistan rəsmiləri – Təhlükəsizlik Şurasının katibi, müdafiə naziri əvəzi, xarici işlər naziri əvəzi, Milli Təhlükəsizlik Xidmətinin direktoru, Silahlı Qüvvələrin Baş Qərargah rəisi də qatılıb.
Nikol Paşinyan noyabrın 1-dən Dağlıq Qarabağda olub, səfər müddətində işğalçı rejimin başçısı Bako Saakyanla müzakirələr aparıb, hərbi qulluqçularla bir araya gəlib.
1988-ci ilin fevralında Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ilin mayında atəşkəslə dayanan müharibədə Ermənistan Dağlıq Qarabağı və onun ətrafındakı 7 rayonu işğal edib.
