Ağdam Muğam Mərkəzi açıldı
Noyabrın 5-də prezident İlham Əliyev Ağdam rayonuna səfər edib. Öncə o, əsaslı şəkildə yenidən qurulan Quzanlı-İmamqulubəyli-Orta Qərvənd-Xındırıstan avtomobil yolunun açılışına qatılıb.
Avtomobil yolu 29 min nəfərin yaşadığı 14 yaşayış məntəqəsini birləşdirir. Ümumi uzunluğu 25,3 kilometr olan yolun hərəkət hissəsinin eni 6 metrdir. Yol iki hərəkət zolaqlı olmaqla 4-cü texniki dərəcəyə aiddir.
Sonra İlham Əliyev Heydər Əliyev Fondunun təşəbbüsü ilə inşa olunan Ağdam Muğam Mərkəzinin açılışında iştirak edib. AZƏRTAC xəbər verir ki, Ağdam Muğam Mərkəzinin ərazisi 7782 kvadratmetrdir. İkimərtəbəli binada qrim, gözləmə, texniki, inzibati, yardımçı və digər otaqlar yaradılıb. Mərkəzdə musiqi alətlərinin təmiri emalatxanası da fəaliyyət göstərəcək. Konsert zalı 328 yerlikdir.
Mərkəzlə tanışlıqdan sonra prezident rayon ictimaiyyətinin nümayəndələri və Ağdam rayonundan olan incəsənət xadimləri ilə görüşüb.
Həmin gün İlham Əliyev “Azərxalça” Açıq Səhmdar Cəmiyyətinin Ağdam filialının açılışında da iştirak edib, həmçinin Ağcabədi rayonunun Hindarx qəsəbəsində fermer Əsmər Hüseynovaya məxsus 4 hektar pay torpağında əkilmiş pambıq sahəsi ilə tanış olub.
