“Səssizlik” nümayiş olunub
Oktyabrın 30-da Bakıda “Səssizlik” qısametrajlı bədii filminin təqdimatı olub.
Film “Education HUB”ın təşkilatçılığı ilə həyata keçirilən “İnkişaf zamanı” proqramının “Ölümsüz düşüncələr” layihəsi çərçivəsində hazırlanıb.
“Ölümsüz düşüncələr” layihəsinə Bakı Dövlət Universitetinin tələbələri Humay Məmmədova və Könül Alıyeva rəhbərlik edirlər.
“Səssizlik” filminin rejissoru Orxan Adıgözəlov, ssenari müəllifi Ələmdar Faiqdir. Filmdə baş rolu Bəhruz Vaqifoğlu oynayır.
“Səssizlik”də məqsəd insanlara kitab oxumağı aşılamaqdır. Filmdə sosial və mənəvi problemlərdən təngə gəlmiş naşir intihara cəhd edir. Lakin birdən otaqda peyda olan gözlənilməz qonaqlar onunla söhbət etməyə başlayırlar və kitabların köməyilə onu çətin vəziyyətdən çıxarırlar.
Filmin nümayiş və müzakirəsindən sonra şair Əli Xəyyamın “Bədii qiraətin cəmiyyətdə rolu” mövzusunda məruzəsi dinlənilib.
