Bakı: sərmayə azalıb, maaş artıb
Bakı Şəhər Statistika İdarəsi paytaxtın sosial-iqtisadi göstəricilərini açıqlayıb. Novator.az-ın məlumatına görə, rəsmi hesabatda bildirilir ki, 2018-ci ilin yanvar-sentyabr aylarında sənayedə istehsalın və xidmətlərin həcmi əvvəlki ilin 9 ayı ilə müqayisədə 0,9 faiz artıb. Sənaye məhsulunun 82,5 faizi mədən sektorunda istehsal olunub. Qeyri-dövlət sektorunun payı 84,8 faiz göstərilir.
9 ayda paytaxtın iqtisadi və sosial sahələrinin inkişafı üçün əsas kapitala 6 milyard 918,8 milyon manat və ya əvvəlki ilin müvafiq dövrü ilə müqayisədə 19,1 faiz az vəsait yönəldilib. Ümumi sərmayənin 38,6 faizi dövlət, 61,4 faizi qeyri-dövlət sektorunun sərmayədarlarının payına düşüb.
Yanvar-sentyabr aylarında ticarət dövriyyəsinin həcmi 2017-ci ilin 9 ayı ilə müqayisədə 3,3 faiz, ictimai iaşə dövriyyəsi real ifadədə 7,3 faiz, əhaliyə göstərilən ödənişli xidmətlərin dəyəri 2,6 faiz artıb.
Hesabata görə, 2018-ci ilin yanvar-avqust aylarında işçilərin orta aylıq nominal əməkhaqqı əvvəlki ilin müvafiq dövrünə nisbətən 0,7 faiz artaraq 787,3 manata çatıb.
