Azərbaycan-Qazaxıstan: ticarət dövriyyəsi 65,6 faiz artıb
Oktyabrın 31-i Astanada Azərbaycan-Qazaxıstan ticarət-iqtisadi əməkdaşlıq üzrə birgə hökumətlərarası komissiyanın 15-ci iclası keçirilib. Energetika nazirləri Pərviz Şahbazov və Kanat Bozumbayevin həmsədrliyi ilə baş tutan iclasda qeyd olunub ki, bu ilin 9 ayı ərzində iki ölkə arasında ticarət dövriyyəsinin həcmi 65,6 faiz artaraq 169,8 milyon ABŞ dollarına çatıb.
Yanvar-sentyabr aylarında Azərbaycandan Qazaxıstana ixrac 65,1 faiz artaraq 36 milyon dollar, idxal isə 65,8 faiz yüksələrək 133,8 milyon dollar olub.
Hökumətlərarası komissiyanın toplantısında ticarət dövriyyəsinin artırılması üçün potensial ixrac məhsulları və şirkətlərin müəyyənləşdirilməsi, Qazaxıstanın infrastruktur layihələrinin həyata keçirilməsində Azərbaycan şirkətlərinin, eləcə də Sumqayıt Kimya Sənaye Parkında qazax şirkətlərinin iştirakının nəzərdən keçirilməsi razılaşdırılıb.
İclasda kənd təsərrüfatı, əmək və əhalinin sosial müdafiəsi, miqrasiya, səhiyyə, mədəniyyət, təhsil, ətraf mühitin mühafizəsi, gənclər və idman, dövlət qulluğu, əqli mülkiyyət, müqavilə-hüquqi bazanın inkişafı və digər sahələrdə əməkdaşlıq məsələləri müzakirə edilib.
