Sosial müavinət hesabatı
Oktyabrın 30-da rəsmi hesabat yayan Əmək və Əhalinin Sosial Müdafiəsi Nazirliyi bildirir ki, hazırda 419,9 min nəfər aylıq sosial müavinət alır.
“Sosial müavinətlər haqqında” qanuna əsasən, əlilliyə, yaşa və ailə başçısını itirməyə görə aylıq sosial müavinət ödənir. Həmçinin sağlamlıq imkanları məhdud uşaqlar, beşdən çox uşağı olan qadınların hər bir uşağı, müharibə veteranları bu sosial təminat növü ilə təmin edilirlər.
Müharibə əlillərinin və şəhid ailələrinin, I və II qrup Çernobıl əlillərinin, müddətli hərbi xidmət qulluqçularının uşaqlarına, ünvanlı dövlət sosial yardımı ilə təmin edilən aztəminatlı ailələrdəki bir yaşadək uşaqlara və qanunvericilikdə nəzərdə tutulan digər şəxslərə də hər ay sosial müavinət verilir.
Uşağın doğulmasına görə ailələr, penitensiar müəssisələrdə cəza çəkməkdən azad edilmiş şəxslər isə birdəfəlik müavinətlə təmin olunurlar.
Dəfn xərci kimi birdəfəlik müavinət, radiasiya qəzasının nəticəsində zərər çəkərək əlil olmuş insanlara hər il birdəfəlik müavinət də ödənir.
2018-ci ilin 9 ayında birdəfəlik müavinətlə təmin olunanların sayı 69,8 min nəfər göstərilir.
