Qaxda açılışlar
Prezident İlham Əliyev oktyabrın 28-də Qax rayonuna səfər edib. AZƏRTAC xəbər verir ki, dövlət başçısı öncə Kənd Təsərrüfatı Nazirliyinin yenidən qurulan Qax Damazlıq İpəkçilik Stansiyasının açılışına qatılıb. Ümumi ərazisi 5 hektar olan stansiyanın ərazisində inzibati bina, laboratoriya və inkubasiya mərkəzi, həmçinin hibrid toxumların istehsalı mərkəzi var.
Baramaqurdu ailələrinin yemlənməsi binası da yaradılıb. Stansiyada hər il 2 min ton yaş barama istehsalını təmin edəcək 4 min qutu hibrid ipəkqurdu toxumunun, 4 kiloqram superelit və 50 kiloqram elit sinfinə aid ipəkqurdu toxumlarının istehsalı planlaşdırılır.
3 hektar sahədə Çin texnologiyası əsasında intensiv tipli tut bağları salınıb. Hazırda stansiyada 11 nəfər daimi işlə təmin edilib. Müəssisə tam işə düşdükdən sonra burada 59 nəfər daimi, 150 nəfər isə mövsümi işlərlə təmin olunacaq.
Sonra İlham Əliyev Qax-Qıpçaq-Ağyazı avtomobil yolunun açılışında iştirak edib. Uzunluğu 44,5 kilometr, hərəkət hissəsinin eni 6-7 metr olan avtomobil yolunun inşası 13 yaşayış məntəqəsinin rayon mərkəzi ilə nəqliyyat əlaqəsini yaxşılaşdırır.
Prezident “Ulu Aqro” MMC-nin Qax Aqroparkının açılışında da olub. “Ağyazı” qışlaq otlağının ərazisində yerləşən aqroparkın yaradılması üçün ümumilikdə 13,7 milyon manat dövlət əsaslı investisiya qoyulub. Aqroparkın ümumi ərazisi 2094 hektardır. İlham Əliyev orada rayon ictimaiyyətinin nümayəndələri ilə görüşüb.
Aqroparkda 1200 hektar sahədə buğda, 169 hektarda qarğıdalı və 65 hektarda soya əkilib. 217 hektar badam, 50 hektar qoz, 32 hektar şaftalı, 30 hektar alma, 23 hektar gavalı, 12 hektar ərik və 11 hektar gilas bağları salınıb.
Dövlət başçısı “Ulu Yurd” Məhdud Məsuliyyətli Cəmiyyətinin “Yurd Hotel” mehmanxanasının açılışında da iştirak edib. Mehmanxana İlisu kəndində ümumi sahəsi 3,3 hektar olan “Yaşıl Park” istirahət mərkəzinin ərazisində inşa edilib. Kompleksin tikinti sahəsi 2100 kvadratmetrdir. Yüz yerlik, üçmərtəbəli mehmanxana binasında müxtəlif kateqoriyalara uyğun 48 otaq var. Otaqlardan 45-i standart, 3-ü ailəvidir. Burada VIP kottec də yaradılıb.
