Prezident Administrasiyası elektron kargüzarlığa keçir
Prezident İlham Əliyev dövlət orqanları və qurumlarında daxili idarəetmə proseslərinin elektronlaşdırılması tədbirlərinə fərman verib. Novator.az-ın məlumatına görə, oktyabrın 27-də imzalanan fərman Prezident Administrasiyasında “Elektron sənəd dövriyyəsi sistemi” yaradılmasını nəzərdə tutur. Kargüzarlığın aparılması işinin səmərəli təşkili üçün yaradılan “Elektron sənəd dövriyyəsi sistemi”nin sahibi funksiyasını Prezident Administrasiyası, maddi-texniki təminatını, işlək vəziyyətdə olmasını (operator funksiyasını) və təhlükəsizliyinin təmin edilməsini Xüsusi Dövlət Mühafizə Xidməti həyata keçirir.
Prezident Administrasiyası 2019-cu il aprelin 1-dək “Elektron sənəd dövriyyəsi sistemi”nin proqram təminatının hazırlanmasını və tətbiqini təmin etməlidir. Quruma idarələrarası elektron sənəd dövriyyəsi sisteminin səmərəli fəaliyyəti üçün zəruri tədbirlər görmək də həvalə olunub. İdarələrarası elektron sənəd dövriyyəsi sistemi haqqında əsasnaməyə, dövlət orqanlarında, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərdə və büdcə təşkilatlarında kargüzarlığın aparılmasına dair təlimata dəyişikliklər edilməsinə dair təkliflər üç ay müddətində prezidentə təqdim olunmalıdır.
Vətəndaşlara Xidmət və Sosial İnnovasiyalar üzrə Dövlət Agentliyi 2020-ci il dekabrın 31-dək Elektron Hökumət İnformasiya Sistemi infrastrukturunda mərkəzləşdirilmiş elektron sənəd dövriyyəsi altsisteminin yaradılmasını və idarələrarası elektron sənəd dövriyyəsi sisteminə inteqrasiyasını təmin etməlidir.
