Merkel partiya liderliyindən gedir
Almaniya kansleri Angela Merkel Xristian Demokrat İttifaqının sədri postundan getmək istəyir. Novator.az bildirir ki, oktyabrın 29-da yayılan məlumata görə, ittifaqın bölgə təşkilatlarının liderləri ilə görüşən Angela Merkel dekabr ayında keçiriləcək sədr seçkisinə qatılmayacağını deyib. O, 2021-ci ildə keçiriləcək parlament seçkisində namizədliyini verməyəcəyini, kansler postuna və başqa hansısa vəzifəyə iddia etməyəcəyini də bildirib.
Angela Merkel 2000-ci ildən Xristian Demokrat İttifaqının sədri, 2005-ci ildən Almaniya kansleridir.
Liberal-mühafizəkar mövqeli partiya olan Xristian Demokrat İttifaqının əsası 1945-ci ildə qoyulub.
Angela Merkel 1954-cü ildə Almaniya Federativ Respublikasının Hamburq şəhərində doğulub. Üç yaşında olarkən valideynləri ilə Almaniya Demokratik Respublikasına köçüb.
1978-ci ildə Leypsiq Universitetinin fizika fakültəsini bitirən Angela Merkel uzun müddət elmi fəaliyyətlə məşğul olub, 1990-cı ildə Almaniya birləşəndən sonra siyasətə qoşulub. Sədrlikdən əvvəl Xristian Demokrat İttifaqında sədr müavini, baş katib postlarını tutub.
