Məhkəmə-Hüquq Şurası hakim təqdimatları verib
Məhkəmə-Hüquq Şurasının iclası keçirilib. Oktyabrın 29-da yayılan rəsmi məlumata görə, iclasda ali və apellyasiya instansiyası məhkəmələrində vakant olan 30 hakim ştatı ilə bağlı müzakirələr aparılıb, dövlət başçısına təkliflər verilib. Təkliflər müsbət dəyərləndirilib, Milli Məclisə həmin namizədlərin təyinatı ilə bağlı təqdimat göndərilib.
İclasda bildirilib ki, 2013-cü ildə təyin olunmuş 71 hakimin ilkin səlahiyyət müddəti bitdiyi üçün onların hər birinin işi yerində öyrənilib, vəzifələrinin öhdəsindən layiqincə gələn şəxslərin səlahiyyət müddətlərinin uzadılmasına dair təkliflər hazırlanıb.
İmtahanlarda müvəffəqiyyət qazanaraq hakim vəzifəsinə layiq bilinmiş 108 nəfər namizədlə bağlı Hakimlərin Seçki Komitəsinin təkliflərinə baxılıb. Həmin namizədlərin birinci instansiya məhkəmələri üzrə müxtəlif hakim vəzifələrinə təyinatları barədə təkliflərin hazırlanması tapşırılıb.
Qanunvericiliyin tələblərini pozan 6 hakim barədə isə intizam icraatları başlanıb.
Novator.az bildirir ki, Məhkəmə-Hüquq Şurası vakant hakim vəzifələrinə hakim olmayan namizədlərin seçilməsinin təşkili, hakimlərin fəaliyyətinin qiymətləndirilməsi, onların iş yerinin dəyişdirilməsi, vəzifədə irəli çəkilməsi, intizam məsuliyyətinə cəlb edilməsi funksiyalarını həyata keçirən orqandır. 2005-ci ilin fevral ayından fəaliyyətə başlayan Məhkəmə-Hüquq Şurasına ədliyyə naziri Fikrət Məmmədov sədrlik edir.
