İstanbulda nələr bəyan olundu?
Oktyabrın 29-u İstanbulda Türkiyə, Azərbaycan, Gürcüstan xarici işlər nazirləri Mövlud Çavuşoğlu, Elmar Məmmədyarov və David Zalkalianinin görüşü keçirilib. Görüşün bəyannaməsində qeyd olunur ki, nazirlər üç ölkə arasında ikitərəfli və üçtərəfli formatda əməkdaşlığın yüksəlməsindən məmnunluq ifadə edirlər və strateji tərəfdaşlıq, mehriban qonşuluq, qarşılıqlı hörmət və etimada əsaslanan əməkdaşlığın daha da möhkəmləndirilməsinə sadiqliklərini təsdiqləyirlər.
Sənəddə dövlətlərin suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığına qarşılıqlı hörmət və qəti dəstək ifadə olunur, Cənubi Qafqaz regionundakı münaqişələrin sülhü, təhlükəsizliyi, sabitliyi və iqtisadi inkişafı təhlükə altına aldığı vurğulanır.
Bəyannamədə Azərbaycanın Dağlıq Qarabağ bölgəsi və ətraf rayonlarında münaqişənin, Gürcüstanın Abxaziya və Cənubi Osetiya regionlarındakı münaqişələrin dövlətlərin suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığı prinsipləri əsasında həllinə nail olmağın əhəmiyyəti qeyd edilir.
Nazirlər terrorçuluq, zorakı ekstremizm və separatçılığın bütün forma və təzahürlərinin, transmilli mütəşəkkil cinayətkarlıq, narkotik maddələr və prekursorlarının qanunsuz dövriyyəsi, qeyri-qanuni silah ticarəti, insan alveri, miqrant qaçaqmalçılığı, çirkli pulların yuyulması, mədəni və tarixi irsə qarşı cinayətlər və digər transmilli təhdidlərə qarşı mübarizədə müvafiq beynəlxalq alətlər əsasında əməkdaşlığın gücləndirilməsinə sadiq olduqlarını bildirirlər.
