“Qarabağ” qrupdan çıxa bilərmi?
UEFA Avropa Liqasının qrup raundunda ilk dövrə arxada qalıb. E qrupunda yarışan Azərbaycan təmsilçisi “Qarabağ” ilk üç turda məğlub olub. Səfərdə Portuqaliya “Sportinq”inə 0:2, evdə “Arsenal”a (İngiltərə) 0:3, “Vorskla”ya (Ukrayna) 0:1 hesabları ilə uduzan ağdamlılar xalsız və qolsuz vəziyyətdə qrupda dördüncü – sonuncu pillədədir.
Növbəti mərhələyə qrupda ilk iki yeri tutan komandalar vəsiqə qazanacaq. Üç turdan sonra “Arsenal”ın 9, “Sportinq”in 6, “Vorskla”nın 3 xalı var.
Noyabrın 8-də “Vorskla” “Qarabağ”ı, “Arsenal” “Sportinq”i qəbul edəcək.
“Qarabağ” – “Sportinq”, “Vorskla” – “Arsenal” oyunları noyabrın 29-na təyin olunub.
Qrup turnirinə dekabrın 13-də keçiriləcək “Arsenal” – “Qarabağ” və “Sportinq” – “Vorskla” oyunları ilə yekun vurulacaq.
Ağdam klubunun növbəti mərhələyə çıxmaq şansı qalırmı? Novator.az-ın sualını cavablandıran futbol icmalçısı Rasim Mövsümzadə deyib: “Nəzəri cəhətdən, əlbəttə, şans var. Avropa Liqasında əvvəlki mövsümlərə baxsaq, 7 xal toplayaraq qrupda ikinci yeri tutub pley-offa çıxan komandaların olduğunu görərik. Hətta bir dəfə bu, “Qarabağ”ın yer aldığı qrupda olub. 2014-2015 mövsümündə F qrupunda 7 xal toplayan Ukrayna “Dnepr”i Azərbaycan təmsilçisini bir xal qabaqlayaraq yoluna davam edib və həmin yarışda finala da çıxıb.
Təbii ki, qrup mərhələsinin ilk dövrəsində rəqiblərin gücünü gördükdən sonra “Qarabağ”ın növbəti mərhələyə çıxmaq şansının yüksək olmadığını deməliyik. Amma nəzəri cəhətdən danışırıqsa, indiki halda 6 xalla da ikinci yeri tutmaq mümkündür. Bunun üçün “Qarabağ” səfərdə “Vorskla” və evdə “Sportinq”ə qalib gəlməli, “Arsenal” da bu rəqibləri məğlub etməlidir. Həmçinin “Vorskla” Portuqaliyada “Sportinq”lə oyunda qələbə qazanmalıdır.
Üç komandanın 6 xalı olsa, o zaman onların arasındakı oyunların nəticələrinə baxılacaq və bu halda top fərqi daha yaxşı olmalıdır. “Qarabağ”da bu göstərici indi 0-3 (“Sportinq” və “Vorskla” ilə oyunların nəticələri) olduğundan növbəti oyunlarda daha böyük hesabla qalib gəlmək lazımdır.
“Arsenal”la oyunda heç-heçə və ya qələbə isə “Qarabağ”ın xalını 7-yə və ya 9-a yüksəldə bilər ki, bu da komandamızın şansını daha da artıracaq”.
