Rusiyanın terrorçu saydığı məhbus beynəlxalq mükafat aldı
Rusiyanın 20 il həbsə məhkum etdiyi ukraynalı rejissor, ssenarist və yazıçısı Oleq Sentsov Avropa Parlamentinin Andrey Saxarov adına “Azad düşüncə mükafatı”na layiq görülüb. Qalibin adı oktyabrın 25-də açıqlanıb.
Novator.az-ın məlumatına görə, mükafatın təqdimat mərasimi dekabrın 12-si Strasburqda olacaq.
Oleq Sentsov 1976-cı ildə Ukraynanın Krım bölgəsinin baş şəhəri Simferopolda doğulub. 2014-cü ildə Rusiya Krım bölgəsini işğal edib özünə birləşdirəndən sonra həbs olunub. Krımda terror aktı hazırlamaqda ittiham olunan rejissor 2015-ci ilin avqustunda 20 il müddətinə azadlıqdan məhrum edilib. Oleq Sentsov özünü təqsirli bilmir və ittihamı siyasi sifariş sayır.
SSRİ dövrünün məşhur dissidenti akademik Andrey Saxarovun adını daşıyan “Azad düşüncə mükafatı” 1988-ci ildən bəri insan hüquqları və fikir azadlığı uğrunda mübarizəyə görə verilir.
Səidə Hüseynova
