Maliyyə hesabatı verməyən partiyalar
Azərbaycanın 9 siyasi partiyası Mərkəzi Seçki Komissiyasına 2017-ci il üzrə maliyyə hesabatı təqdim etməyib. Novator.az-ın məlumatına görə, onların biri Azərbaycan Xalq Cəbhəsi Partiyasıdır.
1989-cu ildə yaradılmış Azərbaycan Xalq Cəbhəsi bundan 6 il sonra partiyaya çevrilib, 1995-ci il sentyabrın 1-də dövlət qeydiyyatına alınıb. 2015-ci il sentyabrın 27-də Azərbaycan Xalq Cəbhəsi Partiyasının VI (IX) qurultayı keçirilib. 2000-ci ildən partiyaya rəhbərlik edən Əli Kərimli yenidən AXCP sədri seçilib. Ancaq Ədliyyə Nazirliyi 27 sentyabr 2015-ci il qurultayının nəticələrini tanımayıb.
Hesabat verməyən digər 8 partiya bunlardır:
Azadlıq Partiyası
Azərbaycan Demokratik Sahibkarlar Partiyası
Azərbaycan Dirçəliş və Tərəqqi Partiyası
Azərbaycan Milli Dövlətçilik Partiyası
Azərbaycan Milli Hərəkat Partiyası
Azərbaycan Tərəqqi Partiyası
Azərbaycan Vətənpərvərlər Partiyası
Müstəqil Azərbaycan Partiyası.
“Siyasi partiyalar haqqında” qanuna əsasən, siyasi partiyalar illik maliyyə hesabatlarını auditor rəyi ilə birlikdə hər il aprel ayının 1-dən gec olmayaraq MSK-ya təqdim etməlidir. MSK bu barədə məlumatları internet saytında yerləşdirməli və ictimaiyyət məlumatlandırılmalıdır. Ədliyyə Nazirliyinin maliyyə hesabatlarını təqdim etməyən siyasi partiyaların dövlət qeydiyyatını ləğv etmək səlahiyyəti var.
Oktyabrın 25-dək 55 rəsmi siyasi partiyadan 46-sı maliyyə hesabatını rəsmiləşdirib.
