“Sosial bağlar” 125 ailəni əhatə edəcək
Əmək və Əhalinin Sosial Müdafiəsi Nazirliyi Heydər Əliyev Fondunun “Regional İnkişaf” İctimai Birliyi ilə “Sosial bağlar” layihəsi həyata keçirir. Layihə çərçivəsində sosial cəhətdən həssas qruplar üçün meyvə bağları salınır, tərəvəz və bostan məhsulları istehsalı üzrə ailə təsərrüfatları yaradılır.
Rəsmi məlumata görə 41 rayon (Tərtər, Ağdam, Bərdə, Füzuli, Quba, Xaçmaz, Qusar, Siyəzən, Şabran, Ağdaş, Kürdəmir, Yevlax, Beyləqan, Ucar, Siyəzən, Salyan, Sabirabad, Qobustan, Ağsu, İsmayıllı, Şəmkir, Daşkəsən, Samux, Ağstafa, Qazax və s.) üzrə 125 ailə üçün təsərrüfatlar qurulur.
Quba, Xaçmaz, Qusar, Siyəzən, Şabran rayonlarında 17 nəfər üçün bağ sahələrinin salınması nəzərdə tutulub. Həmin rayonlarda bağların salınması üçün ayrılmış sahələr qurumuş ağaclardan, kötüklərdən, kollardan təmizlənir, sahələrin şumlanması və çəpərlənməsi işləri görülür.
“Sosial bağlar” layihəsi iştirakçılarından 30 nəfəri şəhid ailəsi üzvləri, 28 nəfəri əlilliyi olanlar, qalanları aztəminatlı ailələrin üzvləridirlər.
